a journey

Hey Luet,

an wittara Bericht us Indien. Mir sind zwar all noch in Jodhpur und gnuessands do so richtig, aber da mir immr uf dr suche nach was Neuam sind hommr mol an Tagesausflug gmacht. Mi hats amol a klae ufs Land zoga und so simmr hald einfach mit am Public Bus druflos gfahra… Mir honds ziemlich guat vertroffa, weil der Ort in den mr sind hot an laessiga alta Tempel ka. Und er isch trotzdem no ned voellig vo Tourista ueberloffa gsi. Denn simmr o a klae durch die Gegend gschtreift und hond a paar Einheimische troffa, dia glob voellig ueberrascht gsi sind, dassas wiesse bis vor ihre Hustuer (wobei ihre Huetta sowas ned ka hond) verschlagt. Jo und denn simmr noch anam hetziga Zmittagessa denn wiedr „hoam“ ge Jodhpur gfahra. D Fahrt war fasch a so interessant wia des Dorf und die verbeizuehande Landschaft isch echt was laessigs, da Osiyan uf am Waeg vo Jodhpur Richtung Wueste ligt, und mir hond doet o scho die ersta Sandduenen gsacha. Aber i glob des sachamr denn in Bikaner noch meh. Uf am Waeg hommr mol an Blick uf an Termometer reskiert, 34 Grad hots azoagat. I hoff euch wuert do a klae warm wenndr des im kalta Europa laessand 😉

Jo und mir sind all noch mit am Mike uf waeg, dem Kanadier vo dem mr scho verzellt hond. Er hat o an Blog, fallsr doet kurz inne luaga waend: „mikemccormickglobetrotter.blogspot.com“ waer sine Adress. Er wuert no fuer 3 wittere Moenat in Indien blieba, und isch voll begeistrat, dass mir um die „ganze Welt“ reisand, und des gleich untr amol. Er isch zwar o scho a klae umma ko aber hald immr nur oa Land uf zmol. Er isch sich jetz aber am ueberlega ob er ned ge Nepal o noch goh soell. Schauamr mol was drus wuert.

So des wars jetz wiedr amol vo ues. No a paar Fotos und ganz schoene Gruass ind Heimat!

Jo und jetz noch zu uesaram jetzdiga Standort.

Mir sind in Jodhpur, des isch die zweitgroeste Stadt in Rajhistan und hat dr Spitznama „the blue City“ weil do d Hueser frueher alle blau agmolat gsi sind. Des hilft erstens gegat d Hitz im Summr und zweitans ischas Indigo guat gegat d Moskitos. Jo und do in dera Stadt taugts ues scho wiedr viiiiel bessr! Erschtens isch d Stadt selber viel suberer als Ajmer und d Strossa sind do zum Teil nur so breit, dass gradamol a Tucktuck durchkummt… des hoasst es isch o weniger Verkehr. Amol in dem bereich wo mir ueser Hotel hond. Jo denn hommr o a hammer Hotel verwuescht, mit anam netta Manager, und o sunsch ischas Hotel spitze. Mir hond sogar an groessara Raum kriagt nur so. Einfach damit dr Marco oefters lachat. Jo und denn gibts ind dem Hotel o Italienisch zum essa. Was vorallam am Marco brutal guat gfalla hat und i muass scho saega i han mi o wiedr amol gfreut „normals“ Essa zum essa. Jo i bin denn jetz wiedr umgstiega uf Indisch, dr Marco wuert wohl so lang wia moeglich des italienische Essa gnuessa. Wobei es o ned wuerklich italienisch isch sondr eher der Versuch vo Inder italienisch zum Kocha.

Jo und denn no zur Stadt. Wia gseht sind die meista Huesle blau, und in dr Mitte vo dr Stadt trohnt uf anam Felsa baut s Maranga Fort. Des isch erschtens echt an Blickfang und zweitens o vo Inna wuerklich sehenswert! Echt der Hammr! Und des ganze isch scho ueber 500 Johr alt. Do hot bis vor dr Unabhaengigkeit vo Indien o dr Maharatscha dinna gwohnt. Der wohnt jetz a klae usserhalb vo dr Stadt in anam oagana Palast. (isch amol in anra Galilleo Folge ko falls dia jemand gsacha hat) An Teil vom Palast isch jetz Hotel fuer rieche Tourista.  Und mit dena Inahma renovierandse denn dr ganze Palast laufend. Mittlerweile gibts o scho a klenns Museum in anam Teil, aber des bliebt wiet hinter dr Erwartunga zruck. (leider) Mir hettand gern meh davoa gsacha aber in die andara Bereiche kummt ma nur als Hotelgast inne. Im Rest vo dr Stadt kann ma o noch an laessiga Garta aluaga und es gibt o ueberall lassige Markets wo ma alles kriagt was das (indische) Herz begehrt, wenn ned sogar meh.

Jo i han versuacht mi kurz zum halta, isch ned ganz glunga, aber i hoff ihr hond soefl Zit zums euch durchlaessa.

und wia immr zum Schluss no a paar Fotos. (Jodhpur rentiert sich uebrigends o zum googlen!)